نفّذت جمعية لجان أهالي الموقوفين في السجون اللبنانية أمام قصر العدل اعتصامها في بيروت تحت عنوان :قضاؤكم يخطف أبناءنا
وكان لهم البيان التالي :بسم الله الرحمن الرحيم الحمدلله
والصلاة والسلام على سيدنا محمد وعلى الله وصحبه أجمعين
ما بدنا نحكي كتير اصبح الظلم في السجون اوضح من الشمس لا سيما بعد الفضيحة المدوية في ملف تفجير المرفأ اللي الجميع يقول عنه اكبر انفجار شهده لبنان وهو تفجير العصر وتفجير العاصمة وقتل المدنيين والعسكر في آن واحد ولحقو هيدي الفضيحة بفضيحة تانية فضيحة النافعة
وقبل ذلك التخفيف على العملاء وتهريبهم الى الخارج الفاخوري وغيره
فأصبح القضاء في لبنان على المستضعف اللي ما اله ضهر وعلى المظلومين
ما عم نقول ما في بالسجون مرتكب في ولكن لا يقارن أي فعل فعله السجين مع تفجير المرفأ ولا مع سرقة أموال الناس وتهريبها الى الخارج ولا مع اللي أفسدو البلاد والعباد ووصلو البلد للإنهيار الحاصل
العالم كله متفق على انه المسؤول الأول لما يحصل في لبنان هي الطبقة السياسية وما في حدا منن بالسجن
السجون يتضاعف فيها الاكتظاظ بسبب ظروف البلد والاهمال القضائي بلا غذاء ولا دواء ولا استشفاء
واللي بقول غير هيك كذاب كذاب كذاب
بقولو الكذابين بالاعلام انه عم يطعموهم ٣مرات دجاج و٣مرات لحمة
مبارح كان في مسؤولين وإداريين وقضائيين عن السجون وشافو بعينن ولمسو وسمعو من بعض السجناء ومن يلي عم يديرو السجون جوا انه الأكل اللي عم تقدمه الدولة ما بكفي ٥%من السجناء وهو طعام رديء جدا جدا الكلاب ما بتاكلو
ومعظم الدوا مش موجود الاهالي عم تأمنو للسجنا بهيدا الغلا اللي موجود
أما الإستشفاء فهو الفضيحة المدوية في السجون صار في قرار بمستشفى الحياة بالتنسيق مع الدولة انه حتى الحالات الطارئة ما يدخلو على الطوارئ الا ليأمن أقل شي ٥٠٠$
من كم يوم شاب عمره ٣٠سنة عرف انه اهله بمنطقة الزلزال اللي صار خاف عليهم وحزن كثيرا
شعر شعور غريب بجسمه ظن انه بدو يموت اخدو على مستشفى الحياة بحالة طارئة رفضوا انه يدخلو طوارئ ويفحصو الا ليأمن ٥٠٠$
بدأ يصيبه فالج على باب المستشفى ولك لسانه ما دخلو جابولو ورقة وقلم ليكتب اسمه لما كتب اسمه شافو رقمه عندهم على الكمبيوتر اتصلو بأهله ليأمنولو ال ٥٠٠$وما دخلو الا لأمنو ال ٥٠٠$وكان صابو الفالج والشلل وهو هلق برومية
مبارح مات سجين بسبب الاهمال الطبي عنده سكري ما كان يتأمنله الدوا أصابت اجره غرغرينا بسبب عدم النضافة في السجون قطعولو اجرو بعد مماطلة واهمال طبي ولكن كان فات الأوان بعد ما قطعولو اجرو مات مبارح وصل خبر وفاته اسمه حسن الحكيم
يعني الدولة مسكرة المدارس لأنها عاجزة عن تأمين مصروفا ومعاشات الأساتذة ولكن مصممي انه تخلي آلاف السجناء مكدسين بلا طعام ولا دواء ولا ادنى مقومات حقوق الانسان
اطلقو سراحهم ايها المجرمون اطلقو سراحهم يا بلا ضمير
اطلقو سراحهم يا بلا انسانية ولا دين
بأي بلد في العالم بصيبه ربع اللي اصاب لبنان بيطلقو سراح العاجزين في السجون حتى يعيلو انفسهم وعيالهم
فأطلقوا سراحهم فورا
جمعية لجان أهالي الموقوفين في السجون اللبنانية
ولم يكتفوا بالتصريح بل كان لهم مسيرة من قصر العدل الى العدلية حيث اغلقوا دوار العدلية مطالبين بتبييض السجون .
بالفيديو
تقرير : رودا بدر
https://vt.tiktok.com/ZS8aXVqrj/
