هيدا بييّ بالمقبرة الجماعيّة …مشهد واحد من مسلسل “النار بالنار” ما ولّع وجع عمرو سنين، لأنو هالوجع مستحيل ينطفي.

هيدا بيّي…هيدا خيي…هيدا جوزي… هيدا ابني… هيدا ملف وجع عمرو سنين. هيدا جرح نازف نازف نازف ليخلص الدم بعروق لِ ما عندن دم ولا قلب ولا ضمير ولا ذرة إنسانية.

مبارح، مشهد واحد من مسلسل “النار بالنار” ما ولّع وجع عمرو سنين، لأنو هالوجع مستحيل ينطفي.

مبارح، مشهد واحد من مسلسل”النار بالنار” حرق قلب اكتر من ٦٣٠ عيلة بعدن عم بيدوّروا عن أثر لأحبة غابوا.

مبارح، بمسلسل “النار بالنار”، مش جورج خباز وحدو كان بطل المشهد بالمقبرة الجماعية. امبارح، كل فرد من عائلات المفقودين بقبور السجون والمعتقلات السورية، حسّ حالو جورج خباز، صرخ متلو ” هيدا بيّي” واتمنى يعرف متلو مصير بيو ،وابنو ، وخيو، وحبيبو. مش لينسى، مستحيل ينسى. ليرتاح لفكرة إنو الأحبة صاروا أخيراً “هونيك”، بمطرح أحلى وأنضف وأطهر بكتير من وسخ السياسية وقرف شياطين الأنظمة الظالمة وبشاعتن.”.

بقلم جوزفين حبشي